transaksi yang sederhana

beta lagi di kamar
abis ganti baju, semprot parfum, gosok pelembab deng bedak
siap mau pi kerja kantor

takuju beta dengar orang baomong di luar
ada satu pak muda sekitar awal 40an
duduk diatas motor yamaha tua su puruk
satu tangan pegang dia pung helm masker ijo,
satu tangan deng hp di telinga

dia berenti di beta pung muka pagar, sonde jao dari jendela kamar
begini dia bilang:
"kaka nona, itu to'o beta biasa bawa tu
ada datang ni.
[diam...]
"iya, di pohon duri"
[diam..]
"ko dia minta di pohon duri na"
[diam, pendek sa]
"dia minta dua stenga"
[diam, sangat pendek]
"sekarang. jadi kaka nona siap su e"
[diam, juga pendek]
"beta su meluncur ni"

isi kambali hp di saku baju,
pake helm ju start motor ko jalan

transaksi pung sederhana lai

beta ada pikir, itu nona ada bikin apa o
su pasti dia ada siap-siap
ganti baju, semprot parfum, pelembab, bedak, lipstik dan lain-lain lai
dia ada pikir apa o..
'lumayan, dapat uang pulsa' atau 'bae su bisa beli anak pung buku'??
abis itu ayun langkah pi kerja

beta ju ayun langkah pi kerja
beta pung pulsa kantor yang bayar
beta pung anak pung buku su bagus-bagus

sial, beta pung transaksi ju kadang-kadang lebih sederhana lai..

14 Agustus 2009